असार १५ गते धान दिवसको दिन काठमाडौं मूलपानीमा तत्कालिन कृषि मन्त्री हरि पराजुलीबाट अभद्र व्यवहार भोगेका महिलाको तश्वीर प्रकाशित गरेकोमा अहिले सामाजिक सञ्जालमा व्यापक आलोचना भइरहेको छ । तश्वीर प्रकाशित गर्दा ति महिलाको बेइज्जत भएको आलोचना गर्नेहरुको तर्क छ ।
तर, ति महिलाको कुनै गल्ती नभएको तश्वीरहरु र भिडिओले प्रष्ट देखाउछन् । पराजुलीले टास्सिन खोज्दा महिलाहरुले प्रतिवाद गरेको पनि तश्वीर र भिडिओमा स्पष्ट देखिन्छ । त्यसैले, ति तश्वीर र भिडिओले महिलाको नभएर पराजुलीको इज्जत गएको छ । जसले गल्ती गरेको छ, इज्जत उसैको जाने हो । गल्ती नगर्नेको इज्जत जाने हाम्रो सामाजिक संस्कार पनि छैन । झन, आधुनिक समाजले त गल्ती नगर्नेको इज्जत खोस्ने कुरै आउदैन । त्यसैले ति महिलाले आफ्नो इज्जत गयो भनेर चिन्ता मान्नुपर्ने कुनै कारण छैन ।
महिलाको इज्जत केही गर्नसाथ गइहाल्ने खालको पातलो र कमजोर हुन्छ भन्ने सोच्नु ठिक होइन । कुनै रुढिवादीले त्यस्तो सोच्छ भने त्यो उसको कमजोरी हो, सम्पूर्ण समाज उसकै सोचको पछि लाग्नु पर्छ भन्ने छैन । त्यस्तो सोचको पछि लागेर समाज अघि बढ्न पनि सक्दैन । त्यस्तो सोच पालिराख्ने हो भने महिला समानता कुनै हालतमा प्राप्त हुन सक्दैन । त्यसैले महिला समानताको पक्षपातिहरुले महिलाको इज्जतलाई त्यति कमजोर बनाउनु हुदैन । हिन्दी सिनेमा र परम्परागत मुश्लिम समाजमा जस्तो महिलालाई कमजोर, इज्जत सधै धरापमा रहेको तथा कतै अनुहार देखाउन नहुने प्राणी बनाउनु हुदैन ।
तत्कालिन मन्त्री पराजुलीको कर्तुत देखाउन ति तश्वीर र भिडिओ अघि सारिएको सबैले बुझेका छन् । तश्वीर र भिडिओ त्यसरी प्रचार नभएको भए त्यो प्रकारको सामाजिक दबाब उत्पन्न हुदैनथ्यो तथा उनले दण्ड पनि पाउदैनथिए । ति तश्वीर र भिडिओ सार्वजनिक हुदा त अनेक कुतर्क दिदै बच्ने प्रयास गर्ने पराजुली, सार्वजनिक नभएको भए मन्त्री पदबाट कुनै हालतमा राजीनामा दिदैनथिए । त्यसो भएको भए, ति महिलालाई अभद्र व्यवहार गरेको अपराधको सजाए उनले पाउने थिएनन् ।
ति महिलाहरुले पत्रकार सम्मेलन गरेर आफ्नो बेइज्जत भएको तथा आफ्नो अपमान भएको बताएका छन् । उनीहरुले त्यस्तो सोच्नु र भन्नु उनीहरुको हिसाबले ठिकै पनि होला । परम्परागत समाजमा हुर्किएका उनीहरुको सोच त्यस्तो हुनु अस्वाभाविक पनि होइन । तर, आफूलाई आधुनिक भन्ने तथा पुरुष बराबर ठान्ने महिला पनि उनीहरुकै तालमा लाग्नु भने स्वभाविक होइन । उनीहरुले त, ‘नआत्तिनुस् आमा, दिदी, तपाईको इज्जत गएको छैन । मन्त्रीले जबरजस्ती टास्सिन खोज्दा पनि प्रतिवाद गर्ने तपाईहरु बहादुर हुनुहुन्छ, तपाईहरुको इज्जत बढेको छ’ भन्नु पर्ने थियो । उनीहरुले त्यसो भनेको भए, ति महिलाको पनि आत्माबिश्वास बढ्ने थियो, उनीहरुको शिर नझुकेर उठ्ने थियो तथा महिला समानताको आन्दोलनमा एउटा भने पनि इटा थपिने थियो ।
0 comments:
Post a Comment